Шыңғыс Айтматовтың «Қош бол, Гүлсары!» повесінің желісімен қойылатын бұл спектакль – адам мен табиғаттың, адам мен жануардың арасындағы терең рухани байланысты, уақыттың өткіншілігін және қоғам өзгерістерінің адам тағдырына әсерін баяндайтын сахналық туынды. Қойылымның негізгі өзегі – Танабайдың өмір жолы мен оның жан серігіне айналған тұлпар Гүлсарының тағдыры. Гүлсарының ғұмыры арқылы адамның жастық шағы, үміті, сенімі мен өмірлік күресі астасып, бір дәуірдің келбеті ашылады. Қойылым көрерменді уақыт пен тағдыр туралы ойлануға, адам өмірінің мәнін, табиғатпен үйлесімнің қадірін сезінуге жетелейді. Бұл спектакль Шыңғыс Айтматов шығармасының рухын сақтай отырып, оның көркемдік-идеялық мазмұнын заманауи театр тілімен жеткізуді мақсат етеді.
