Астана түнгі қашықтыққа шығады

5 қыркүйекте елордада жаппай Night Run түнгі жүгіру жарысы өтеді. Жарыстың басталуы сағат 20:00-де Триатлон-парк аумағында жоспарланған. Қатысушылар 5 шақырым қашықтықты бағындырады.

Жарыс тәжірибелі жүгірушілерге де, жүгіруді енді бастап жүргендерге де арналған. Қатысушыларды музыка, түрлі белсенділіктер және түнгі Астананың ерекше атмосферасы бар спорттық кеш күтеді.

Жарысқа қатысу тегін, алайда орын саны шектеулі — ұйымдастырушылар 1 700 слот қарастырған. Алдын ала онлайн тіркеу 2 қыркүйекте басталды.

Тіркелген қатысушылар старт нөмірі мен лотерея билетін жарыс өтетін күні сағат 17:30-дан 19:30-ға дейін Триатлон-парктен ала алады.

Бұл ретте автокөлік жүргізушілеріне әдеттегі бағыттарын өзгерту қажет болмайды: жүгіру жарысы толығымен Триатлон-парк аумағында өтеді. Осыған байланысты қала көшелерін жабу және көлік қозғалысын шектеу жоспарланбаған.

Night Run жарысы Астана қаласы әкімдігінің, «Алматы» ауданы әкімінің аппаратының, елорданың Дене шынықтыру және спорт басқармасының және Спорттық-бұқаралық іс-шараларды өткізу дирекциясының қолдауымен ұйымдастырылады.

Іс-шара бұқаралық спортты дамытуға және елорда тұрғындары арасында белсенді өмір салтын насихаттауға бағытталған. Тек 2026 жылдың алғашқы жартыжылдығында Астанада 21 жүгіру жарысы мен марафон, сондай-ақ бес веложарыс өтті.