Астана WIPO City of Innovation 2026 байқауының финалына өтті

Сыйлық инновациялар мен креативтілікті дамытуға жағдай жасайтын қалаларды атап өтеді. Байқау барысында қалалардың іске асырылған жобаларымен қатар, алдағы 12 айға арналған нақты даму жоспарлары мен міндеттемелері де бағаланады.

Астана өз өтінімінде цифрлық дамудың кешенді тәсілін ұсынды. Негізгі бағыттардың бірі — жасанды интеллект пен деректерге негізделген Astana Smart City тұжырымдамасы. Ол ақпараттық жүйелерді, IoT-сенсорларды, көлік инфрақұрылымын, бейнеағындарды және қаланың цифрлық егізін бір интеллектуалды жүйеге біріктіруді көздейді.

Тағы бір маңызды бағыт — Astana.kz платформасын «қызмет ретінде қала» моделі бойынша дамыту. Платформа тұрғындарға жекелендірілген цифрлық қызметтерді алуға және жасанды интеллект негізіндегі ассистент арқылы қаламен өзара әрекеттесуге мүмкіндік беретін бірыңғай цифрлық кеңістікке айналуы тиіс.

Сонымен қатар елордада инновациялық экожүйені одан әрі дамыту жоспарлануда. Бұл білім беру мен стартаптарды жеделдетуден бастап, зерттеулер мен әзірлемелерге және технологиялық шешімдерді халықаралық нарыққа шығаруға дейінгі бағыттарды қамтиды.

Осылайша, Астананың байқауға ұсынған тұжырымдамасы цифрлық технологияларды, жасанды интеллектіні, стартаптарды дамытуды, қаланың тұрақтылығы мен қолжетімді ортасын бір арнаға біріктіреді.

WIPO City of Innovation байқауының қорытындысы 12 қазанда Женевада жарияланады. Халықаралық іріктеу нәтижесінде үшке дейін қала жеңімпаз атанады.