Қазақстандағы алғашқы гуманоидты робот зауытының құрылысы басталды

QAZBOT жобасы робототехника және жасанды интеллект саласындағы зерттеулерді, инженерлік әзірлемелерді, жергіліктендірілген өндірісті және шешімдерді практикалық енгізуді біріктіретін жаңа технологиялық алаңға айналады.

Кешен базасында R&D орталығын құру, бағдарламалық жасақтама мен AI-модельдерді дамыту, робототехникалық жүйелерді тестілеу және бейімдеу, сондай-ақ инженерлік мамандарды даярлау жоспарлануда.

Жобаның бірінші кезеңіне салынатын инвестиция көлемі шамамен 200 млн АҚШ долларын құрайды.

Рәсімге Қазақстан Республикасы Жасанды интеллект және цифрлық даму министрлігінің, Астана қаласы әкімдігінің, QAZBOT Technologies компаниясының және компанияның стратегиялық технологиялық серіктесі — AGIBOT өкілдері қатысты.

Құттықтау сөзін ҚР ЖЦДМ Цифрлық активтер және серпінді технологиялар комитетінің төрағасы Жолдас Саханов сөйледі.

Қатысушылар болашақ кешеннің негізін қалап, жобаның тұжырымдама мен дайындық кезеңінен тікелей құрылыс және технологиялық инфрақұрылымды қалыптастыру кезеңіне өткенін атап өтті.

«Бүгін біз өзіміздің технологиялық инфрақұрылымымызды құрудың практикалық кезеңіне көшіп отырмыз. Біздің міндетіміз — Қазақстанда зерттеулерді, инженерлік құзыреттерді, өндіріс пен шешімдерді енгізуді біртұтас жүйеге біріктіру. Бұл озық технологияларды бейімдеп қана қоймай, өзіміздің әзірлемелерімізді қалыптастыруға және мамандар даярлауға мүмкіндік береді», — деп атап өтті QAZBOT Technologies компаниясының CEO-сы Владислав Сафаров.

QAZBOT қызметінің негізгі бағыттарының бірі робототехникалық және AI-шешімдерді нақты процестерге енгізу болады. Перспективалы бағыттардың қатарында өнеркәсіп, логистика, қаржы секторы, медицина, білім беру, әлеуметтік сала, сервистік қызметтер және экономиканың басқа да салалары бар.

Кешен құрылысының басталуы жобаның практикалық іске асуының бастау нүктесіне және Қазақстанда робототехника мен жасанды интеллект саласындағы өзіндік индустрияны қалыптастырудың жаңа кезеңіне айналды.