Астанада білім беру жүйесін дамытуға арналған педагогтердің тамыз конференциясы өтті

Конференция аясында білім берудің түрлі деңгейлері мен бағыттарын қамтитын 16 тақырыптық панельдік сессия ұйымдастырылды. Қатысушылар мектепке дейінгі тәрбие, жалпы орта, техникалық және кәсіптік, сондай-ақ инклюзивті білім беру мәселелерін талқылады. Бұдан бөлек, тәрбие жұмысына, педагогтердің кәсіби дамуына және білім беру ұйымдарын басқарудың заманауи тәсілдеріне назар аударылды.

Негізгі тақырыптардың бірі оқу процесінде жасанды интеллектіні қолдану болды. Педагогтер білім сапасын арттыру, оқу процесін жетілдіру және кәсіби құзыреттерді дамыту үшін цифрлық құралдарды пайдалану мүмкіндіктерін қарастырды. Сонымен қатар ЖИ технологияларын жауапкершілікпен қолдану және оларды түрлі пәндерді оқытуға енгізу мәселелері талқыланды.

Инклюзивті білім беруді дамытуға да ерекше көңіл бөлінді. Мамандандырылған сессияларда сараланған оқыту тәжірибелері мен ерекше білім беру қажеттіліктері бар балаларды қолдау тәсілдері қарастырылды. Қатысушылар оқушылардың психологиялық саулығы, қауіпсіз білім беру ортасын қалыптастыру, оқу сауаттылығы мен функционалдық дағдыларды дамыту мәселелерін де талқылады.

Панельдік пікірталастардан бөлек, қатысушылар үшін 15-тен астам шеберлік сабағы, практикалық секциялар, TED Talks, воркшоптар, арт-терапия, AI-хакатон және тақырыптық көрмелер ұйымдастырылды. Халықаралық сарапшылар білім берудегі инновациялар, мектепті басқару және жасанды интеллектіні енгізу бойынша тәжірибелерімен бөлісті.

Конференция білім беру жүйесін дамыту жолдарын талқылауға және кәсіби тәжірибе алмасуға арналған алаңға айналды. Іс-шара барысында цифрлық технологиялармен қатар адами капиталды дамыту, білім сапасын арттыру, педагогтердің кәсіби өсуі және қауіпсіз әрі қолжетімді білім беру ортасын қалыптастыру мәселелері қарастырылды.